Myanmar sipai sorkarin Suu Kyi-i party a ṭhiahsak

Myanmar sipai sorkar hnuaia election commission chuan an ram hruaitu aṭanga paihthlak tak, Aung San Suu Kyi-i kaihhruai political party, National League for Democracy (NLD) chu a ṭhiahsak.

State television MRTV-in a tarlan danin, election commission hian an ram inthlanpui neih tur atan NLD hi a in register ve loh avangin political party a nihna chu ṭhiahsak a ni tih a sawi. Thawhlehni thleng khan political party-te in register theihna hun hi hawnsak niin, party 40 vel chu an in register lo a ni.

Sipai sorkar hian inthlanpui buatsaih a nih tur thu sawi mah se, a hun tur a la ruat fel lo. Hetih lai hian sipai sorkar hian media-te a khuahkhirh tlat leh, Suu Kyi-i party hruaitu tam zawk a man avangin inthlanna hi dik leh felfai taka buatsaih a ni thei dawn lo tiin NLD lam chuan an sawi a ni. NLD hruaitu zinga mi, Bo Bo Oo chuan, "Political leader leh political activist tam tak man leh hren beh, mi tam tak sipaiten an nghaisak mek laia inthlan buatsaih a tum hi kan pawm lo a ni," a ti. Hei vang hian March 21-a an party central working committee meeting chuan election commission-a in register loh hi a rel ta tih a sawi.

Myanmar sipai sorkar ruahman dan chuan inthlanpui hi July thla tawp lamah neih hman tum a ni. Mahse February thla khan an rama state emergency a puan chu thla ruk dang a pawhsei leh avangin, inthlan neih hun tur pawh hi sawnhlat a ngai leh dawn a ni.

January thla khan sipai sorkar hian political party-te registration law thar siamin, political party ding sate pawh election commission-a in register ṭha leh vek turin a ti ta a, March 28 thleng hun a hawng a ni. Hun tiam chhunga in register lote chu political party an nih na hlihsakin, ṭhiah nghal an ni ang tih a sawi. Political party-te hi anmahni duhthu emaw, dan hmangin emaw party an nihna ṭhiahsak a nih chuan, an thil neihte chu sorkar kutah an hlan tur a ni, tih a ni bawk. MRTV chuan dan thar siam hnuah, political party 63 chu election commission-ah hian an in register tih a sawi. Kum 2020 inthlanpuiah khan registered party hi 90 chuang an awm.