Zelenskyy-a'n Ukraine tlawh turin China President a sawm

Ukraine president Volodymyr Zelenskyy chuan China president, Xi Jinping chu Ukraine ram tlawh turin a sawm.

Russia ram ṭhianṭha tak, China hian nikum February thlaa Russia-in Ukraine ram a run hnuah khawthlang ram hrang hrangten Russia demna thu an sawi leh an hrek lai pawhin engtin mah a ṭawngchhuak ve lo a, mahse thla hmasa khan Ukraine ram buaina chinfel a nih theihna tura ruahmanna, point 12-a siamte chu a tichhuak a ni. A rawtna siam zingah hian Ukraine-a inkahhai puante a tel. Ram pahnihte inkara indona a chhuah hnuah President Xi leh Zelenskyy-te hi an la inbe lo bawk a ni.

Kar liam ta khan President Xi chuan Russia tlawhin, Russia president Vladimir Putin nen meeting an nei a, Russia-Ukraine inbeihna thleng mek chungchang pawh an sawi dun.

Ukraine chuan Russia nena an inkara China a rawn inrawlh ve ta chu lawmawm a tih thu a sawi a, mahse Ukraine ram aṭanga Russia sipaite an chhuah hnuah chauh boruak ṭha leh muanawm a awm thei dawn niin a sawi. Mahse US chuan China hian Ukraine a run chungchangah Russia ram demna lam a chhakchhuah ve loh avangin, China rawtna siam a pawm ve lo tih a sawi thung.