Suu Kyi-i party ṭhiahsak ram dangte'n an dem

Myanmar sipai sorkarin Aung San Suu Kyi-i party, Natio­nal League for Democracy (NLD) a ṭhiahsak chu Australia, Japan, United Kingdom leh United States chuan an dem thu sawiin, he thil hian Myanmar ramchhung boruak a tihchhiat zual a hlauhawm thu an sawi.

Myanmar sipai sorkar hnuaia Election Commission chuan NLD leh party dang 39-te chu an ram inthlanpui neih tur atana registration ti tura hun pek chhungin an in register lo tih sawiin, political party an nihna a ṭhiahsak a ni. Hetih lai hian inthlanpui buatsaih tum a nih thu sipaite chuan sawi mah se, a hun tur erawh an la ruat fel lo.

Japan foreign ministry chuan NLD ṭhiah chuan Myanmar ram boruak siamṭhatna tura hmalakna a tichhe zawk thei tih sawiin, Myanmar sipai sorkar chu NLD official an hren mekte, Suu Kyi-i telin chhuah tura an phut thu a sawi a, an ram boruak siamṭhatna tura party tinte an tel theihna tur kawng ngaihtuah turin an phut tih a tarlang bawk.

US state department deputy spokesperson Vedant Patel chuan NLD leh political party dang 39-te ṭhiah an nih chu na takin an dem tih a sawi. "Burma rama stakeholder zawng zawngte an tel theih lohna inthlan buatsaih chu a dik leh felfai angah ngaih theih a ni lo ang," tiin Myanmar hming hmasa a rawn hmang.

UK foreign office pawhin political party 40 zet ṭhiah an ni chu Myanmar mipuite dikna chanvo leh zalenna rahbehsakna a ni, a ti. 'Sipai sorkar thiltih dan hi kan dem a, an chetdan rawng tak hmanga mipuia hlauhna an tuh leh, eptute an rahbelhna hi kan dem tak zet a ni," a ti.

Australia foreign affairs and trade department chuan sipai sorkar hnuaia inthlana tel tur, political party-te in register tan harsa tak siam thar chu ngaihtuah zui a ngai hle niin a sawi. Politics thilah chuan party zawng zawngte an tel phalsak vek tur an ni a, party tam tak ṭhiah a nih chuan tharum thawhna leh boruak ṭha lo thleng a tizualkai zawk dawn niin a sawi. "Sipai sorkar chet dan chu uluk takin kan thlithlai zui reng dawn. Inthlanna rintlak a awm theihna turin demcoracy chu tunding leh thuai turin kan phut a ni," tiin an sawi.

United Nations (UN) pawh­in NLD ṭhiahsak a nih hnuah, Myanmar ramah chuan democra­cy tungding turin sipaite an ngen. UN secretary-general Antonio Guterres thupuangtu, Stephane Dujarric chuan an duh loh dan thil a thleng leh tih sawiin, Myanmar ramah chuan democracy tundin leh a, Suu Kyi-i leh midang mante pawh chhuah zalen tura an duh thu a sawi. Hemi atan hian theihtawp an chhuah zel dawn tih a sawi bawk.