Pope Francis damdawi-inah dah

Catholic kohhran hruaitu, Pope Francis chu thawk lamah harsatna a neih avangin Nilaini khan Rome khawpuia damdawi-inah dah luh a ni.

Vatican thuchhuah chuan kum 86 mi, Pope Francis hian tun hnaiah thawk lam harsatna hi a nei tih sawiin, Covid-19 hri erawh a kai lo tih a sawi. Damdawi-inah hian ni rei vak lo enkawl a ni dawn a, ngaihtuahawm lutuk a ni lo tih a sawi

Palm Sunday, Good Friday leh Easter Sunday-te a thlen chhoh dawn avangin Pope buai hunlai tak tur a ni a, tunkar tawp hian Palm Sunday Mass neih a ni dawn a, kar lehah Holy Week leh Easter lawmna neih a ni bawk ang. Hei bakah April thla tawp lamah Hungary tlawh a tum bawk.

Pope hian khup na a neih avangin chet vel a harsat a, hei vang hian wheelchair a hmang tel ṭhin a ni. Kum 2021 khan ril lam na a neih avangin zai a ni tawh bawk. January thla khan a na hi a rawn chhuak leh niin a sawi. Mahse hrisel lo tak chungin a mawhphurhnate a hlen zel a, ram pawn lamah pawh a zinchhuak tho a ni. February thla khan Congo leh Sudan ramte pawh a lo tlawh tawh a ni.