US-in Russia-a America mi awmte a rang thei anga chhuahsan turin hrilh

US state department secre­tary Antony Blinken chuan, Russia sorkarin Moscow-a America sorkar tana enthlatua puha Wall Street Journal reporter a man hnuah, America mi la awmte a rang thei anga Russia ram chhuahsan turin a hrilh.

Antony Blinken chuan, "Russia-in US citizen journalist a man thu a sawi chu kan ngaih­ven reng a, Hetih lai hian State Deparmtent chuan US mi leh sate himna chu a dah pawimawh ber a ni. US khua leh tui, Russia-a cheng leh zin mekte chu a rang thei ang berin he ram hi chhuahsan turin kan ngen a ni," tiin twitter-ah a tarlang.

Russia chuan WSJ journalist, Evan Gershkovich chu America sorkar tana thawk a, enthlatua puhin an man tih Nilaini khan a sawi a, an man ni tak erawh a sawilang lo.

Blinken chuan Gershkovich man a nih chungchangah WSJ lam pawh an be pawp tawh tih a sawi a, chhuah a nih theihna turin an theih angin an pui zel dawn tih a sawi. Russia chetdan chu an dem thu a sawi nghal bawk.

White House press secretary Karine Jean-Pierre pawhin Gershkovich chhawrtu, WSJ chu White House leh State Department official-ten an biak thu sawiin, a chhungte pawh biakpawh an ni, a ti. Russia sorkarin American citizen bitum a, Gershkovich man a ni chu na takin an dem tih a sawi ve bawk a ni.

Kum 31 mi, Gershkovich hi enthlatua puh chungchangah hian thiam loh chantir a nih chuan, kum 20 thleng lung-in tang tura hrem theih a ni ang. Cold War hnuah Russia rama enthlatua puha American news organisation hnuaia journalist man hmasa ber a ni. Gershkovich hi WSJ Moscow office-ah correspondent journalist-in a awm a, Russia leh Ukraine indo chungchang a ziak ṭhin.

Tun hnaiah khawthlang ramten an hrek avanga Russia economy a nghawng dan turte a lo ziak bawk.