Brazil President hlui Bolsonaro an ramah a kir leh ta

Brazil president hlui Jair Bolsonaro chu inthlana a chak loh hnuah an ram chhuahsana, US-a thla thum a awm hnuin Ningani khan Brazil-ah a kir leh ta.

Brazil President thlanna hnuhnung berah Bolsonaro hian Luiz Inácio Lula da Silva a hneh zo lo a, amah thlawptute chuan buaina siam zuiin January 8 khan sorkar building pawimawhte luhkhungin an suasam zui a ni. Buaina chhuakah hian Bolsonaro chu a mawphurtuah puhin, chhui zui mek a ni.

Bolsonaro hi Brazil khawpui, Brasilia-ah amah thlawptu, Liberal Party mi leh sa eng emaw zatin an lo hmuak a, mahse pungkhawm hi an beisei angin an tam lo nia sawi a ni. Brazil a kir leh hnua a thusawi hmasa berah, Bolsanaro chuan rorellai Leftist-te chuan thuneihna an chan rei a ring lo tih a sawi. Nakuma municipal inthlan a, mayor 5,500 thlanna neih tura an party campaign pui turin a theih anga tam Liberal Party headquarters lamah hun a hman tur thu a sawi bawk.