NKorea sipaite silai mu 635 bo vangin Hyesan khawpuiah lockdown puang

North Korea ram hotu, Kim Jong-un chuan sipaite silai mu 653 a bo avangin, a bona hmun nia sawi Hyesan khawpuiah silai mu bote hmuh a nih hma chuan lockdown a puang niin Raido Free Asia chuan a tarlang.

Mi nuai 2 vel chenna, Hyesan khawpui aṭanga sipaite an inlakchhuah laiin assault rifle mu hi a bo tih sipaite hian an hrechhuak a, thuneitute lama thlen kher loa zawn hmuh an tum a ni. Mahse an zawn hmuh theih tak loh avangin thuneitute hnenah an thlen a, hemi hnu hian he khawpuiah hian lockdown puan a ni nghal a ni.

Silai mu bo zawnnaah hian khapwui chhunga factory, farm, social group leh pawl dang hrang hrangte pawh theihtawp chhuah turin hriattir an ni bawk.

SKorea video thehdarh vangin tihlum

North Korea sorkar hian South Korea media tihchhuah chhawn vang te, sakhaw thil leh ruihhlo kaihhnawihah an ram mi eng emaw zat a tihlum niin SKorea-a Unification Ministry chuan a tarlang.

Ministry hian kum 2017-2022 chhunga NKorea aṭanga tlanchhuak, mi 500 chuangte kawmna a lakkhawm, phek 450-a chhah report a siam chu Ningani khan a tichhuak a ni. Mi hrang hrangte an kawmna aṭang hian, NKorea chuan thi tura hremna pekna khawp pawikawihna ni lo, ruihhlo hmansual, South Korea video thehdarh leh sakhaw thil vangtein mi tam tak a tihhlum tho niin an sawi.