Israel-in Syria-ah airstrike a nei

Israel sipaite chuan nimin zing khan thlawhtheihna hmangin Syria khawthlang lama Homs khawpui an bei a, Syria sipai panga an hliam.

Syria state news agency, SANA chuan Israel sipaite hian March 30 leh 31 khan Damascus an lo bei tawh bawk niin a sawi. Nimin zingah Beirut hmarchhak lam aṭangin Israel sipaite hian Homs khawpui hi an kap niin a tarlang bawk.

Syria air defence chuan Israel missile kahchhuah eng emaw zat hi lo dangin an lo kapthla tih an sawi.

Britain-based war monitor, Syrian Observatory for Human Rights chuan Israel sipaite hian Syria sorkar sipai leh Iran thlawptu pawlte hmun chu an bitum niin a sawi a, research centre pakhat a kang tih an sawi bawk. Observatory director Rami Abdul Rahman chuan, Syria sipai pangaten hliam an tawrh bakah, research centre an kahnaah hian Iran hnuaia fighter ṭhenkhat an thi niin a sawi bawk. March 31-a Israel sipaten Damascus an beih ṭum khan Iran Revolutionary Guard officer pakhat a lo thi tawh bawk a ni.

Israel hian Syria a beih chungchang hi a sawi lang ngai lo a, hemi rual hian Syria rama an hmel­ma, Iran-in an mi leh sa an dah leh, insawhngheh an tumna chu a remti dawn lo tih a sawi fo thung. Kar liam ta khan Iran thlawp helpawlten ralthuam an dahkhawmna hmun nia sawi, Aleppo airport bul ami chu missile hmangin a lo kahsak tawh bawk.