Pakistan-a ei tur semnaa inpawngnekna thlengah mi 11 an thi
Pakistan chhim lam, Karachi khawpuiah ei tur semnaa inpawngnekna thlengah mi 11 an thi a, thi zingah hian naupang pathum an tel.
Leiba ngah avanga sum lama harsatna tawk mek, Pakistan ramah hian thil man a sang chak hle. Mi tam takin harsatna an tawk a, hei vang hian charity hrang hrangin an theih angin mipuite harsatna chhawk zangkhai dan ngaihtuain, ei turte an sem ṭhin.
Kar liam ta Zirtawpni khan Karachi-a Sindh Industrial and Trading Estate (SITE) company chuan mipuite hnenah ei tur hi semin, an semna hmunah hian mipui pungkhawmte chu an inpawngnek zui a, ṭhenkhat chu kawrah tlain, ṭhenkhat chu bang chimin a delh niin police-te chuan an sawi. Thuneitute chuan ei tur semna hmunah hian mipui innekbuai tur veng tura police official-te dah vek turin a lo hriattir tawh a, mahse factory neitu hian ei tur a sem dawn hian official lam engmah hriattir loin, ruahmanna mumal tak pawh siam a ni lo nia sawi a ni.
Police-te chuan chhiatna thleng vang hian factory-a thawk mi pariat chu thu zawhfiah turin an hreng a, an zingah hian factory manager pawh a tel.
Karachi awmna, Sindh province chief minister chuan inpawngnekna thlenga thi chhungte chu zangnadawmna, Rs nuai 5 ṭheuh leh hliam tuarte chu Rs nuai 1 ṭheuh pek an ni dawn tih a sawi.
Pakistan sorkar chuan Ramadan thla chhunga chhungkaw rethei zawkte chu a thlawnin chhangphut a sem ṭan a, distribution centre hrang hrangah kalkawm an tam thei hle. Hei vang hian thuneitu lam pawhin kalkhawmte thunun tur hian police duty tir zel turin a lo ti tawh a ni.