China-in tar-te hnena damdawi lam chhawmdawlna pek a titawp

China sorkar chuan sum indaih lohna avangin tarte hnena damdawi lam chhawmdawlna a pek ṭhin chu a titawp a, pension kum pawh tihsan a tum bawk nia sawi a ni.

Thla tina tarte hnena damdawi lam chhawmdawlna a pek ṭhin a tihtawp avangin January thla aṭang khan lungawi lohna lantir a lo ni fo tawh a ni. Khawpui hrang hrangah lungawi lohna hi lantirin, sorkar chu a thutlukna siam hi sut leh turin an phut. Nawrh an huaihawt hi Chinese media-te chuan 'grey hair movement' tiin an vuahsak.

China sorkar hian kum thum chhung Covid-19 hri leng khuahkhirhna tura a hmalaknaah sum a hmang nasa a, mass testing, quarantine leh a hri leng do hna a kalpuina dangah sum a sen hnem avangin sorkar sum indaihlohna pawh a tam chho hle. Hei vang hian sum indaihlohna phuhruk ṭhenna tura a hmalakna zingah senior citizen-te tana medical benefit a siamsak chu a titawp tel a ni.

Official-te chuan 'grey hair movement' hi a punlun chhoh zel an hlauhthawn thu sawiin, a darh chhoh zel chuan mipuiten rorellai, Communist Party an rinna chu tlahniamin hei hian buaina nasa zawk a thlen an hlauthawng a ni.