Malaysia-in thi tura hremna pek titawp dawn

Malaysia Parliament lower house (Dewan Rakyat) chuan an rama pawikhawihtu, thi tura hremna pek theihna, death penalty titawpna tura dan siamṭhat chu nimin khan a pawm.

Dan an siamṭhatah hian, death penalty chu invuak emaw, kum 30-40 thleng lung in tantir emaw in thlak a ni dawn a ni. Pawikhawihtute jail tan hun tur bithliah siam pawh thlak vek a ni a, hetih lai hian damchhung lungin tan hun, kum 30 chin tia bithliah chu a ngaia hman chhunzawm a ni thung ang.

He dan siamṭhat hi Parliament upper house (Dewan Negara)-ah ngaihtuah a ni ve leh ang a, pass a nih chuan an ram lal hnenah thawnin, hming a ziah hnan hnuah hman ṭan a ni ang.

Bill pass hmaa an sawihonaah, deputy law minister Ramkarpal Singh chuan capital punishment chuan an beisei ang result a nei lo tih sawiin,ṭhiah an duhna chhan a sawi. Malaysia ramah hian thi tura hremna pek theihna pawikhawihna hi chi 34 a awm.

Dan thar hi hman a nih hnuah, a hmaa thi tura an chungthu lo rel sak tawhte chuan an hremna chu ennawn turin, ni 90 chhungin ngenna an thlen thei ang. Jail tang zingah thi tura an chungthu relsak hi mi 1,341 an awm mek a ni. Kum 1992-2023 chhungin thiam loh chantir mi 1,318 chu khaihlum an lo ni tawh a ni.

Khawvel ram hrang hrang zingah Malaysia bakah ram dang 52 ten thi tura hremna pekna dan hi an la hmang mek a ni. Malaysia ṭhenawm ram ṭhenkhat chuan capital punishment hi an la hmang uar hle. Nikum khan Singapore chuan ruihhlo tawlh vanga thiam loh chantir mi 11-te a tihhlum a, Myanmar pawhin democracy activist pali a tihlum bawk.