US-ah thlipui tleh vangin mi 32 an thi

US chhim leh khawthlang lama kar liamta kartawpa thlipui tlehin chhiatna a thlena thi chu mi 32 an tling tih official-te chuan an sawi.

Inrinni liam taa thlipuiin Memphis, Tennessee a nuai vanga thingkung eng emaw zat tlu chuan in a tichhe nual a, chhiatna thlengah hian mi pathum an thi hi Mephis Police Department chuan a tarlang.

Tenesess-a McNairy County-ah pawh Inrinni khan mi pakua an thi bawk a, Tennessee department of health chuan Pathianni khan county pathumah thlipui tleh vangin mi pathum an thi tih an sawi bawk. Owen County, Indiana-a campground-ah nupa an thi bawk a ni.

Arkansas, Illinois, Indiana, Delaware, Mississippi leh Alabama-te pawh thlipui hian a nuai a, thli tleh vanga chhiatna thlengah mi 15 an thi a, mi eng emaw zatin hliam tuarin, in tam tak a chhe tel bawk.

US president Joe Biden chuan chhiatna thleng vangin Pathianni khan Arkansas-ah 'major disaster' a puang a, chhiat tawkte ṭanpui leh chhawmdawl hna thawk turin thupek a tichhuak a ni. President chuan kartawpa thlipui tleh avanga chhiatna tawkte chu a nupui, Jill Biden nen an ṭawngṭaisak thu sawiin, official-te chu harsatna tawkte a rang thei anga ṭanpui tura a tih thu a sawi.