East Jerusalem-a al-Aqsa mosque-ah buaina chhuak

Israel police leh Palestinian-te chu nimin khan East Jerusalem-a al-Aqsa mosque-ah intibuaiin, police-te hian Palestinian mi 350 vel an man tih an sawi.

Police-te hian mosque chhungah Palestinian mi, buaina chawh chhuah tum mi eng emaw zat chu halpuah, tiang leh lung nen an inkhung niin an sawi a, heng mite hi an man a ni.

Hetih lai hian Palestinian lam chuan Israel police-te hian stun grenade leh rubber bullet hmangin mosque-a awmte hi an bei a, mi 14 in hliam an tuar phah niin an sawi ve thung. He thil thlen hnu lawkah hian Gaza Strip aṭangin Israel beihnan rocket pakua kahchhuah zui a ni bawk a, mahse eng pawl kahchhuah ber nge tih erawh hriatchian a la ni lo.

Muslim ho thla serh, Ramadan leh Juda Passover holiday a innan chhoh laiin buaina hi a chhuak a ni.

Al-Aqsa mosque hi Islam ho hmun thianghlim pathumna niin, Muslim hoin al-haram al-Sharif (Noble Sanctuary) tih hmunah a awm a, he hmun vek hi Juda-te chuan Temple Mount tiin, Juda-te temple pawimawh pahnih awmna a ni a, an hmun thianghlim a ni ve bawk.

Thawhlehni khan Palestinian-te chuan Ramadan puala tlai lam ṭawngṭaina hun an hman zawhah, mosque hi luh theih loh turin daidanna an siam a ni. Hetih lai hian Juda-te chuan Bible hun laia an lo tih ṭhin angin, an temple-ah hian Passover puala kel hlanna hun hman an tum ve bawk a ni.

Israel police-te chuan mosque-a inkhuarte chu rawn chhuaka inbiak­na neihpui an tum a, mahse vawi tam tak an ngen hnuah an chhuah duhloh avangin, police-te hi compound-ah hian hruaichhuak turin an lut ta niin a sawi. Palestinian-te hian police-te hi lungin an lo tawng a, mosque chhung aṭang hian halpuahte an lo hal khum bawk. Buaina chhuakah hian Israel police officer pakhatin hliam a tuar a ni. Police-te hian prayer hall-a halpuah hal lai video clip te pawh an tichhuak a ni.

Palestinian Red Crescent chuan buaina chhuakah hian Palestinian mi 14-in hliam an tuar niin an sawi a, Palestinian president Mahmoud Abbas-a thupuangtu Nabil Abul Rudeineh chuan Israel police-te chetdan chu a demthu sawiin, Muslim inkhawm laite beihna a ni, a ti. "Kan ram luahtu (Israel) te chu hmun thinghlimte rawn pel lo turin kan hrilh duh a nia, an tilui a nih chuan buaina lian tak a chhuak zawk ang," tiin a vau zui.