Israel-in thlawhtheihna hmangin Lebanon leh Gaza Strip a bei
Israel sipaite chuan Lebabon aṭanga rocket hmanga beihna chhang letin, nimin zing khan Lebanon chhim lama Hamas ho hmun leh Gaza Strip chu thlawhtheihna hmangin a kap.
Ningani khan Lebanon aṭangin Israel beihna atan rocket 34 zet kahchhuah a ni a, hei hi Hamas ho thiltih niin Israel lam chuan a puh. Mahse Hamas chuan rocket hi an kah a nih thu an sawilang lo thung.
Lebanon media-te chuan Israel sipaite hian an ram chhim lama al-Qulaila khua chu kapin, lei pawh a chhe tel tih an sawi. Mahse Israel defence force (IDF) chuan Hamas firfiak pawlte infrastructure an kapchhia tih an sawi thung. "IDF chuan Lebanon ram chhung aṭanga Hamas firfiak pawlten Israel an beih an remti ngai dawn lo a, an ram chhunga Hamas-te chetnaah Lebanon chu engkima mawphurtuah a ngai dawn a ni," a ti. Israel missile kahchhuah hian Tyre khaw bul, Rashidiyeh-a Palestinian refugee camp bula leilette a fuh tel nia sawi a ni bawk.
Israel sipaite hian Gaza Strip-a Hamas ho hmun 10 an kap fuh a, heng zingah hian ralthuam siamna atana an hman leihnuaia an hmun siamte, workshop pathum leh underground tunnel te a tel niin an sawi bawk. Israel sipaite hian Gaza lamah hian rocket 44 vel an kap chhuak niin Israel media-te chuan an tarlang.
Israel prime minister Benjamin Netanyahu chuan Ningani zan khan security cabinet meeting ko nghalin, an hmelmaten an beihna chu na takin an chhang let zel dawn tih a sawi.