Pakistan Parliament-in Supreme Court thupek a hnawlsak

Pakistan Supreme Court-in Punjab province inthlan buatsaih tura thupek a tihchhuah chu Ningani khan parliament, National Assembly chuan a hnawlsak.

April 4 khan chief justice Umar Ata Bandial kaihhruai judge pathum awmna, SC bench chuan Election Commission-in Punjab province inthlan neih hun tur, April 30 aṭanga October 8-a a sawn hlatna chu hnawlsakin, May 14-a inthlan nei tur hian thupek a tichhuak a ni.

Mahse Ningani khan National Assembly chuan Supreme Court thupek hi ngaihtuahin, ṭangrual sorkara tel party-te chuan prime minister Shehbaz Sharif chu Court thupek kaltlangpui lo turin an nawr. Hemi hnu hian SC thupek hnawlna resolution hi pulutin, an pawm zui a ni. National Assembly chuan politics thila court inrawlh chu a ṭha lo an tih thu leh, court thutlukna chuan ram chhunga inṭhendarhna a thlen thei zawk niin an sawi.

Hetih lai hian prime minister hlui, Imran Khan-a party, Pakistan Tehreek-i-Insaf (PTI) chuan resolution putluh hi an thlawp lo thung a, PTI member Mohin Leghari chuan resolution pass chu court thupek zah lohna lantirna a nih thu leh, hei hian SC nena indona a chawh chhuah theih thu te, an ram tana thil hlauhawm tak a nih tur thute a sawi. Mahse hetichung hian SC thupek hnawlna resolution hi pass a ni ta tho a ni.