Myanmar mi tam tak Thailand-ah tlanchhia

Myanmar sipai leh helpawlte inbeihna nasa tak thleng avangin Myanmar mi tam tak chu Thai­land ramah an tlanchhia niin nimin khan Thailand official-ten an sawi.

Myanmar sipaiten kum hnih liam taa civil sorkar thuneihna an hnehchhuh hnuah sipai sorkar duhlotute nena inbeiin, tualchhung buaina hi a la chhuak reng a ni.

Thailand official-te chuan tun hnuaiah Thailand-a Tak province ramri bul, Karen state-ah Myanmar sipai leh helpawlte an inbei nasa hle tih an sawi a, an inbeihna hmun aṭang hian mi 3,998 chu Thailand ramah an tlanlut tawh a ni, an ti. Heng mite hi sorkar agency leh NGO-te chuan ei leh in tur an pe a ni. Tak province official-te chuan local armed force, police leh civil administration chuan thil thleng hi ngun takin an thlithlai reng tih an sawi.

Karen helpawl, Karen National Army chuan sipaite ramri bula an inkah thu hi an sawi. January thla khan Karen state-ah hian sipaite leh helpawl hi nasa takin an lo inbei tawh a, mi sang tel chu Thailand ramah an lo tlanchhe tawh bawk a ni.

Sipaiten thuneihna an chan hnua tualchhung buaina chhuakah sipaite kutah mi 3,212 vel an thi tawh a, mi 17,000 chuang jail-ah tantir an ni tawh bawk niin Assistance Association for Political Prisoners chuan a tarlang.