Syria aṭanga rocket hmanga beihna Israel sipaiten chhang let
Israel sipaite chuan Syria aṭanga rocket hmanga Israel hmar lam kah a nih hnuah, nimin zing khan Syria ram an bei let ve leh nghal.
Israel chuan laipui bakah drone hmangin Syria rama rocket an rawn kahchhuahna hmun hi an bei let tih an sawi. An beih zingah hian Syria 4th Division compound bakah radar leh artillery post-te pawh a tel.
Syria ram aṭang hian Israel lamah rocket hi ṭum hnih kahchhuah niin, a hmasa zawkah hian rocket pathum kah a ni a, hengte hi Israel-in a luah mek, Golan Heights leiletah an tla. A ṭum hnihnaah hian rocket pathum bawk chu Israel hmarlam beih nan kahchhuah a ni leh a, Israel ram chhungah siren pawh tihrik a nih phah bawk. Rocket pahnih hi Israel ram chinah kap lutin pakhat chu leiletah a tla a, pakhat erawh chu an lo kapthla. A dang pakhat hi Jordan ram chin, Syria ramri bulah a tla nia sawi a ni.
Lebebon-a Al Mayadeen TV chuan rocket hi Palestinian Islamic Jihad movement-a armed wing, al-Quds Brigades ten an kahchhuah a nih thu an sawi niin a tarlang.
Syria ram chhung aṭanga an ram beih a nih chungchangah, Syria chu mawhphurtuah an puh tih Israel Defence Force thuchhuah chuan a tarlang.
Kar liam ta Ningani khan Lebanon chhim lam aṭangin rocket 30 vel chu Israel beihna atan kahchhuah a lo ni tawh bawk a, hei pawhin Israel sipaite chuan na takin an chhang let zui leh nghal a ni.