China-in Taiwan Strait-ah military drill buatsaih

China chuan Inrinni liam ta khan ni thum awh tur, military drill chu Taiwan Strait-ah a nei ṭan a, hei hian Taiwan a tithinur nghal hle.

China hian Taiwan hi a ram chin niin a chhal a, mahse Taiwan hian mahnia ro inrelna ram hran an ni tih an sawi thung. Taiwan president Tsai Ing-wen leh, US House speaker-ten meeting an neih hnu lawkah drill neih a ni dawn tih China chuan puangin, zan dar 7-ah indo thlawhtheihna 71 leh lawng lian pariat a tir nghal a ni.

He drill hi United Sharp Sword tia vuahin, Taiwan Strait hmar leh chhim lam bakah, khawchhak lama airspace pawh an hmang a ni. China sipai, People's Liberation Army (PLA) chuan thuchhuah a siamah sipai nunchan zirna an neih chu Taiwan inlakhran tumtute leh, Taiwan leh China inkara ram dang rawn inrawlh tumte tana warning a nih thu a sawi.

Taiwan defence ministry chuan China sipaite chetla chu ngun taka an thlithlai reng thu sawiin, a ṭul a nih chuan an ram himna turin an chhang let dawn tih a sawi a ni. China sipaite chet dan chuan Indo-Pacific boruak muanawm tak a tichhia tiin, interational security-ah a ṭha lo zawngin nghawng a nei ngei dawn tih a sawi. US pawhin China chet dan chu an ngaihven ve reng thu a sawi ve bawk.