Iran-in hmeichhia lu khuh lote enfiahna tur camera dah dawn

Iran thuneitute chuan an ram chhunga vantlang hmunah leh kawngpuiahte hmeichhia an lu khuh lote manchhuah an nih theihna turin camera dah vek a ni dawn tih an sawi.

Police-te chuan hijab law hnuaia hmeichhiate inchei dan tur, dress code zawm lo hi an pung zel tih sawiin, hemi venna atan hian ruahmanna thar hi an siam tih an sawi. Pawn chhuahnaa hmeichhia, an lu khuh lote chu a tirah text message hmangin warning pek an ni ang a, dan an bawhchhiat zui zel chuan hremna pek an ni ang, tiin an tarlang.

He ruahmanna hi hijab law bawhchhiat tumte venna tur a ni tiin, dan bawhchhiate hian sakhaw inkaihhruaina lama an ram hmel an tichhia tih an sawi. Police-te chuan a mimal emaw, a huho emaw a dan bawhchhiate chu an enliam mai mai dawn lo tih an sawi bawk.

Nikum September thlaa hijab dan zawm ṭha lo tia morality police-ten an man, Kurdish hmeichhia kum 22 mi chu police-te kuta a awm laiin a thi a, hei vang hian ram chhungah pawh lungawi lohna nasa tak lantirin, lungawi lohna lantirna kal zelah hmeichhe tam tak chuan an lu an khuh duh tawh lo a ni. Hei vang hian police-te chuan Inrinni liam ta khan dress code kengkawh tura hmalakna tur an kalpui tur thu hi an puang ta a ni.

Kum 1979 revolution hnua Iran-a dan an hman hnuaiah, hmeichhiate chu pawn an chhuahnaah an sam khuh bo a, thawmhnaw pawh an taksa pianghmang langchiang thei lo tura thawl ha tura tih an ni. Dan bawhchhiate hi man emaw, pawisa chawitir emaw an ni ṭhin.