NKorea-in SKorea lam biakna ni 4 a chhang tawh lo

North Korea chuan South Korea nena military hotline hmanga an inbiakpawh ṭhin chu a zawnin ni thum a chhang duh tawh lo.

Korea ram pahnihte hian military line pahnih hmang hian ni khatah ṭum hnih an inbe ṭhin a, mahse kar liamta Zirtawpni aṭang khan nimin thlengin NKorea an call-na hi a chhang tawh lo niin SKorea defence ministry official-te chuan an sawi.

North Korea hian call a chhan lohna chhan hi engmah a la sawilang lo. Mahse inbiakpawh a duh loh hian Korea ram pahnihte inkar a chhiat zualzia a lantir niin mi ṭhenkhat chuan an ngai. Tun hnaiah SKorea leh US-in joint military drill an neih avanga NKorea lungawi loin ralthuam a enchhin fo avangin, Korean peninsula boruak hi a ṭha lo hle a ni. NKorea hian kar liam ta khan "Haeil-2" nuclear-capable attack drone chu tuihnuaiah enchhin a nih thu a sawi leh a ni.

Kum 2017, August thla khan ni eng emaw zat chu NKorea hian inbiakna hi a lo chhang duh tawh lo bawk a, a hnu lawkah Japan lamah ballistic missile a kapchhuak zui a ni.

SKorea activist-ten NKorea sawiselna leaflet campaign an neih ṭhin duh loin, NKorea hian hotline hi kum khat vel a lo titawp hman bawk. Kum 2021, July thla aṭang khan hotline hi an hmang chho leh a, mahse nitina inbiakna an neih hian ram pahnihte inkar boruak erawh a tihṭhat phah lutuk chuang lo a ni. Kum 2022, June thla khan NKorea lam hian phone call hi hun eng emaw chen a chhang lo leh a, mahse hei chu ruahsur nasain khawl lamah harsatna a thlen vang niin a sawi.