Afghan sakhaw hruaituten hmeichhe zirna khapsak sawisel

Aghanistan-a sakhaw hruaitute chuan Taliban sorkarin an rama hmeichhiate lehkha zir a khapsak chu an sawisel a, Taliban minister chuan sorkar thiltih dan sawisel lo turin a vau zui nghal.

Sakhaw hruaitute chuan hmeichhiate lehkha zir khap an nih chungchang chu thuneitute chuan an ennawn a ngai tih an sawi. Hmeichhiate tan bik class hran siam a, zirtirtu pawh hmeichhia ruai a, facility tharte pawh siam a ni zawk tur a ni, a ti. Islam sakhua chuan hmeichhiate lehkha zir a khapsak lo a, hriatna zau tak neih chu mipa leh hmeichhiate tan a ṭul ve ve a ni, an ti.

Taliban member zinga mi, sakhaw hruaitu pakhat pawhin hmeichhe naupangte lehkha zirtir an nih theihna turin ministry chuan harsatna awmte chinfelna hun a nei a ni, tiin ministry-ah hian supreme leader Hibatullah Akhundzada pawh a tel a, a thupek avang hian Taliban sorkar chuan hmeichhe naupangte school kal hi a khap nia sawi a ni. "Islam chuan hmeichhia leh mipa lehkha zir a phalsak vek a, hemi rual hian hijab leh thil dang pawimawh erawh ngaihtual tel a ngai a ni," tiin a sawi bawk.

Taliban sorkara acting education minister Nida Mohammad Nadim chuan sakhaw hruaitute thusawi hi chhang let nghalin, sorkar policy sawisel leh dodal zawngin sakhaw hruaitute an ṭawngchhuak tur a ni lo, a ti. Mipuite hel turin an fuih phur mai mai niin a puh a, he khapna siam dodal tura mipuite cho chhuah chu Muslim-te tan eng nge hlawkna tur awm tiin a zawt let.