Myanmar sipaiten helpawl hun hman lai an beihnaah mi 30 an thi

Myamnar sipai sorkar dodaltu, People's Defence Force (PDF) in nimina Sagaing area-a an office hawnna inkhawm an buatsaih lai chu Myanmar sipaiten thlawtheihna hmangin an bei tih sawiin, mi 30 an thi nia sawi a ni.

Hetih lai hian Sagaing biala chengte chuan sipaite beihnaah hian mi 50 an thi a, an zingah hian civil mi eng emaw zat an tel tih an sawi thung.

Sipai lam chuan he thil thleng chungchangah thu­chhuah engmah an la nei lo.

PDF member pakhat chuan local office hawnna inkhawm an neih laiin sipaite hian fighter jet hmangin awmkhawmte chu an rawn kap tih a sawi, ruangte hi an la lakchhhuah theih loh avangin thi zat pawh hi an la hrechiang lo niin a sawi.

Kum 2021, February 1-a civil sorkar thuneihna an hnehchhuh hnuah, sipai sorkar hian sipai sorkar dodalna lantirtute leh civil mite a bei fo a ni. March thla khan Myanmar hmarthlang lama thingtlang khaw pakhat chu thlawhtheihna aṭangin a lo kap tawh bawk a, hemi ṭum hian civil mi pariat thiin an zingah hian naupang pawh an tel. January thla khan sipaite hian khaw pakhat bomb-in mi pasarih an thi bawk a, nikum September thla khan Sagaing biala school pakhat chu sipai helicopter hmangin a bei a, naupang eng emaw zat an thi bawk a ni.

Ram hrang hrangin civil mite beia an puhna chu Myanmar sipai sorkar chuan a pha a, firfiak ho chauh bei niin a insawi thung.