US-Philippines in Joint military exercise nei

United States leh Philippines chuan nimin aṭang khan joint military exercise an buatsaih tawha a lian ber an nei ṭan.

South China Sea-a joint drill a neih hi Bali­katan (shoulder to shoul­der) tih a ni a, live-fire drill an neih tel ṭum khatna tur a ni. He drill-ah hian ram pahnih aṭangin sipai 18,000 vel an tel.

Balikatan hi Phili­ppines president Ferdinand Marcos Jr hnuaia exercise an neih ṭum khatna tur a ni. A thlak tak, president hlui Rodrigo Duterte khan US nena an thawhdunnate a hnawl hnuah, Marcos Jr hian US nena inlaichinna ṭha siam tumin hma a la chho leh mek a ni. Tun hnuaiah ram pahnihte hian South China Sea-a joint maritime patrol chu ṭan thar leh te, Philippines rama US sipaite chet velna tura inremna pawh an siam tawh a, hei hi China lam chuan a ngaimawh nghal hle. Inremna an siamna hnuaiah hian US sipaite chu Philippine military base pali dang an hman phalsak an ni dawn a, heng zingah hian Taiwan aṭanga hla vak loa naval base pawh a tel.

Balikatan exercise hi kar hnih chhung neih a ni dawn a, he hunah hian America sipai 12,200, Fillipino sipai 5,400 bakah Australian sipai 100 vel an tel ang. Nikum aiin exercise-a sipai tel hi a let hnih dawnin an tam. America sipaite hian Patriot missile an hmang tel dawn a, hei hi khawvela air defence system ṭha ber zinga sawi tel a ni. Hei bakah hian HIMARS precision rocket sytem-te an hmang tel ang.

Nimina Manila-a military camp-a exercise hawnna inkhawm neih lai hian, camp bulah leftwing lam mi ṭhenkhat pungkhawmin sorkar chu kumtina he exercise buatsaih ṭhin chu titawp turin an phut.