Israel PM-in Muslim ni lote al-Aqsa Mosque compound tlawh a khap

Israel prime minister Benjamin Netanyahu chuan Muslim-te thla serh, Ramadan a zawh hma chu East Jerusalem-a al-Aqsa Mosque compound chu nimin aṭang khan Muslim ni lote tan tlawh a khap. Ramadan hi ni 10 hnuah a zo tawh dawn a ni.

East Jerusalem-a al-Aqsa mosque hi Islam ho hmun thiang­hlim pathumna niin, Muslim hoin al-haram al-Sharif (Noble Sanctuary) an tih hmunah a awm a, he hmun vek hi Juda-te chuan Temple Mount tiin, Juda-te temple pawimawh pahnih awmna a ni a, an hmun thianghlim a ni ve bawk. Muslim-te thla serh, Ramadan leh Juda-te hun pawimawh, Passover a innan chhoh vangin al-Aqsa Mosque compound-ah hian an lo innawr buai tawh a ni.

Prime Minister office chuan defence minister Yoav Gallant, IDF chief of staff Herzi Halevi, Shin Bet chief Ronen Bar leh police commissioner Kobi Shabtai-te biakrawn an nih hnuah he thupek hi tihchhuah a ni tih a sawi. Hetih lai hian far-right police minister Ben Gvir chuan sorkar thutlukna siam hi a sawisel thung a, Juda-te beihna remchang siamna zawk tur niin a sawi. "Firfiakten min bei a nih chuan na takin kan bei let tur a ni a, kan inpe mai tur a ni lo," a ti.

Israel sipaiten Palestinian gunmen 2 an kaphlum

Israel sipaite chuan sipaite kaptu nia sawi, Palestinian mi pahnih chu Thawhlehni khan West Bank hmarlamah an kaphlum.

Palestinian health ministry chuan Israel sipaiten an kahhlumte hi Saud Abdullah Saud leh Mohammed Abu Dira-te an nih thu a sawi a, an chanchin dang erawh a sawilang tel lo.

Israel sipaite chuan heng mi pahnihte hian Nablus chhim lama Juda-te chenna hmun, Elon Moreh bula Israel outpost chu silai nen an bei a, sipai duty-te chuan kap letin, an kaphlum ta niin an sawi. An thurualpui dang pakhat chu zawn mek a ni tih an sawi a, an inkahna hmunah hian M-16 rifle leh pistol chhar a ni. Sipaiten an kahhlum zinga pakhat, Saud hi kum 15 zet Israel tan-ina lo tang tawh, nikuma chhuah a ni.