Myanmar sipaiten Sagaing bial an beih thu nemnghet

Myanmar sipaite chuan Sagaing biala sipai sorkar eptu, helpawlte office hawnna inkhawm neihna hmun an beih thu an nemnghet.

Sipai thupuangtu, Zaw Min Tun chuan Thawhlehni zinga Pa Zi Gyi khuaa helpawlte office hawnna inkhawm neihna hmun chu security force-ten thlawhtheihna hmangin an bei tih Thawhlehni zan khan sawichiangin, "Thi zinga a tam zawk chu sipai sorkar dodaltu, helpawl uniform nena inthuamte an ni" tiin, civil mi anga inthuam pawh thi zingah an tel ve maitheih thu a sawi. Hemi rual hian mi ṭhenkhat thihna chhan chu helpawl, People's Defence Force(PDF)-te chilpuah phum vang niin a sawi bawk.

Sipaite hian inkhawm buatsaihna, community hall chu fighter jet hmang­in an bomb a, a hnuah heli­copter aṭangin silaiin an kap zui leh bawk. Hall-ah hian mi 150 vel an awm nia sawi a ni. Report ṭhen­khat chuan sipaite beihna avanga thi hi mi 100 vel an tling niin an sawi a, an zingah hian hmeichhia leh naupang 20-30 an tel a ni.

United Nations chuan Myanmar sipaite chet dan hi na taka demin, UN secretary-general Antonio Guterres chuan sipaite chu an ram mipuite an beihna titawp turin a ti. UN state department thupuangtu, Vedant Patel pawhin rawng taka chetna hi sipaiten mihring nunna an zah loh zia leh, an ram tualchhung buaina thleng mekah a mawhphurtu an nihzia lantirtu a ni, a ti.