Mi pawng kahtu Thailand sipai kap hlum
Thailand security force-te chuan nimin khan Thailand hmarchhak lam, Nakhon Ratchasima khuaa shopping mall-a mi pawng kahtu, Thailand sipai chu an kap hlum tih an sawi.
Kar liam ta Inrinni, an ram huna chawhnu dar 3 vel khan Thailand sipai pakhat, kum 32 mi Jakrapanth Thomma chuan military camp-a commanding officer chu thatin camp aṭangin ralthuam a ru chhuak a ni. Hemi hnuah a silai rukchhuah hmang hian kawtthlera awmte a kap a, a hnuah shopping mall-ah kalin mall-a awmte chu a pawng kah zui leh bawk. Mi 26 zet a kaphlum a, mi 57 in hliam an tuar bawk.
Pawikhawihtu hian shopping mall-ah hian mi eng emaw zat a hreng zui a, security force-te chuan luhchilhin mall-a tang eng emaw zat an chhanchhuah hnuah, nimin zing dar 2.30 vel khan pawikhawihtu hi an kaphlum a ni.
Jakrapanth Thomma hian pawikhawihna rapthlak tak a thlen hma hian a social media account-ah pistol leh silai mu thlalakte post-in, 'thil phurawm tak thlen a hun ta' tih leh, 'tumahin thihna an pumpelh thei lo' tih thute a ziak tel bawk. Mahse pawikhawihna thlen hnuah a page hi Facebook lam chuan a tihtawp sak nghal a ni.
Thailand prime minister Prayuth Chan-ocha chuan Nakhon Ratchasima khuaa thil thleng chu pawi a tih thu leh, hetiang pawikhawihna hi thleng nawn tawh lo se a duh thu a sawi. Nimin khan Nakhon Ratchasima hospital-a pawikhawihna thlenga hliam tuarte a tlawh.
Jakrapanth pawikhawihna thlen chhan tak hi hriat chian ni lo mah se, report ṭhenkhat ram neitu nihna chungchanga an buma nia a hriat avanga thinrimin he thil hi a thlen ta niin an sawi.