ASEAN-in Myanmar sipaite air strike neih a dem

Myanmar sipaiten Sagaing biala helpawl, People's Defence Force (PDF) local office hawnna inkhawm neihna hmun thlawhtheihna hmangin a bei tih a sawichian hnuah, nimin khan Association of Southeast Asian Nations (ASEAN) chuan Myanmar sipaiten air strike an nei chu na takin an dem tih thuchhuah siamin an tarlang.

Regional block chuan, "Myanmar Armed Force-in Pa Zi Gyi khuaa air strike a nei chu ASEAN chuan na takin a dem a ni. Hetianga inbeihna leh thisen chhuahna, a bikin civil mite chunga sipai chakna hman hi tihtawp a ni vat tur a ni," tiin a sawi.

United Nations, United States leh khaw­thlang ram dangte pawhin sipai chet dan hi an dem thu an lo sawi tawh bawk.

Ram 10 awmna, ASEAN-ah hian Myanmar pawh hi member a ni. Myan­mar-a sipai sorkar a din hnua tual­chhung buaina thlengah, ASEAN hian boruak ṭha leh muanawm a awm theihna tura hma lain, sipai hotu genenal Min Aung Hlaing chu hemi kawnga hmalakna tur point panga awmna inremna pawh an lo siampui tawh a, hma erawh an sawn lo hle.

Thawhlehnia sipaiten Pa Zi Gyi an beihnaa thi hi mi 133 an tling niin civil sorkar aiawhtu atana din, National Unity Government-a human rights minister Aung Myo Min chuan a sawi. Mi 50 velin hliam an tuar bawk a ni.

Sipaite hian kap zui tawh lo mah se, khaw chungah hian fighter jet an la thlawh kualtir reng nia sawi a ni bawk.