UN tan Afghanistan-a hnathawh kawngah harsatna awm lo : Taliban

Afghanistan-a rorellai, Taliban thupuangtu Zabihullah Mujahid chuan United Nations (UN) hnuaiah Afghan hmeichhiate hna an thawh phalsak lo mah se, UN tan Afghanis­tan-a hnathawhna kawngah harsatna a awm phah dawn lo tih a sawi.

Taliban hian kar liam ta khan Afghan hmeichhia, UN Mission hnuaia thawkte chu an hna thawh chhunzawm hi a khapsak a ni. He khapna hi intelligence agency-in a siam a ni.

UN chuan Taliban-te thutlukna siam hi an pawm lo tih sawiin, hmeichhiate dikna chanvo palzut­ sakna a ni, an ti. Afghan-a chhawm­dawl leh ṭanpui ngaite tana an thawhna kawngah hmeichhiate chu an pawimawh hle tih a sawi bawk.

Zabihullah Mujahid chuan sorkar thutlukna siamah an pawl hotu lu leh thuneitute dangte chu dem leh mawhpuh ngawt tur a ni lo tih sawiin, he thil hi ramchhung inrelbawlna thil a ni a, ram dangte pawh an zahsak tur a ni, a ti. "He thil avang hian UN chu thliarna emaw, a hnathawhna kawngah harsatna emaw a awm phah dawn lo. Kan ram mite dikna chanvo pek vek hi kan tum a ni. Tuna kan ram dinhmun thlirin, UN member ramte chuan kan harsatna sutkianna turin Afghanistan laka hrekna siam te, a thil neih khawih chet theih loha siamsak mekte hi an chinfelsak a ngai a ni," a ti.

Taliban-ten thuneihna an chan hnuah ram hrang hrangten hrekna an siam avangin an ram economy pawh a tlachhe zui a, hei vang hian chhawmdawltu pawl hrang hrangte chuan ei tur, zirna leh healthcare lamah Afghan mipuite hi an chhawmdawl mek a ni. Mahse Taliban hian NOG-ah hmeichhiate an tel ve a khapsak avangin chhawmdawl hna thawhna leh sem chhuahna kawngah pawh an bahhlah phah hle.

Eng ram mahin Taliban sorkar hi an la pawm lo a, UN-a an ram seat-ah pawh Taliban-te'n an paihthlak tak, sorkar hmaa president Asharf Ghani a la awm chhunzawm a ni.