Ukraine President leh a official-te USD mtd 400 tichingpenah puh
US journalist Seymour Hersh chuan Ukraine president Volodymyr Zelenskyy leh a official ṭhenkhatte chuan US-in Ukraine sipaite hman tur, diesel fuel leina atana a pek USD mtd 400 vel an tichingpen niin a website-ah a tarlang.
Hersh hian website-ah hian, Ukraine president leh a thawhpui eng emaw zat chuan diesel fuel leina tura ram dangten ṭanpuina an pek tam tham tak an tichingpen a, Central Intelligence Agency chuan nikum chhunga fund an tihchingpen hi USD mtd 400 a tlin thu an sawi, tiin a ziak.
Eirukna chungchangah Ukraine chuan Afghan war dinhmun ang a tawng chho mek a, hetih lai hian Ukraine lam aṭang hian professional audit report hmuh tur a awm lo tiin intelligence official hnen aṭanga a thu hriat chu Hersh hian a tarlang a ni.
Pulitzer Prize-winning journalist Hersh chuan US-in fuel leina tura sum a pek hnuah, President Zelenskyy hian leina tura an tih aṭanga lei loin, Russian fuel chu man tlawm zawkin a lei a ni, a ti. Heng thurukte hi American intelligence official hnen aṭanga a dawn a nih thu a sawi bawk. A thudawnna hian foreign policy official pahnih, US secretary of state Antony Blinken leh National Security adviser Jake Sullivan-te a dem thu leh, Ukraine buaina chungchangah political skill nei loah a ngai tih a tarlang bawk.
Nikum February thlaa Russia-in Ukraine a run hnuah, US hian Ukraine chhawmdawlna tur hi a pe fo a ni. Thla hmasa pawh khan ralthuam leh hmanrua, USD mtd 350 pek a tiam leh bawk. February thla khan security package thar, USD mtd 425 thleng bakah, USD tld 1.75 chu Ukraine Security Assistance Initiative (USAI) fund atan a pek tur thu a lo puang tawh bawk. Heng package thar a pek turte nen hian US-in Russia-Ukraine indona thlen hnua Ukraine ram ṭanpuina a pek hi USD tld 29.3 hu a tling thei tawh dawn a ni.