US intelligence document putru kaihhnawihah airman 1 man

US intelligence document pawimawh, Ukraine indona thleng mek chungchang leh national security chungchang ziahna putru kaihhnawihah US airman, kum 21 mi Jack Teixeira chu man a ni.

Ningani khan FBI chuan Teixeira hi an chhungkaw in, Massachusetts-a Dighton hmunah an man. Nimin khan Boston, Massachussetts-a court-ah hruai a ni.

Teixeira hi intelligence document putru an hmuhna hmasa ber, social network Discord-a online gaming chat group, Thug Schaer Central-a an hotu a ni. He group-a awmte hi a tam zawk chu tleirawl niin, an zingah hian Russia leh Ukraine mi pawh an tel. Massachusetts National Guard-a intelligence wing-ah IT specialist a ni. National Guard hi US Air Force-a reservist wing niin, sipaiah full time angin chhawr lo mah se, a ṭulna hmun apiangah dah theih an ni. Texeira official title hi Cyber Transport Systems journeyman tih a ni a, Airman 1st Class rank a ni bawk.

US intelligence document putruah hian thuruk pawimawh tak tak a tel, Ukraine war chungchang pawh eng emaw zat a tel a ni. Hei bakah US leh a thawhpui Israel, South Korea leh Turkey chanchin ziahna te pawh a tel bawk. Tun ṭuma document leak hi Snowden leh US army whistleblower Chelsea Maning-te'n an lo tihchhuah ang kha ni loin, a hard copy nia sawi a ni.

Heng document-te hi Teixeira hian 'Thug Shaker Central' online gaming group-ah rawn dah hmasa berin, a hnuah social media platform hrang hrang - Twitter, Facebook leh YouTube-ahte a darh zui a ni.