Texas-a bawng farm kangah bawng 18,000 thi
United States-a Texas state-a bawng farm-a kangmei nasa tak chhuakah bawng 18,000 an thi.
Dimmitt khaw bul, South Fork Dairy-ah hian tun kar tir lam khan thil puakin, kangmei nasa tak a chhuak zui a ni. Bawng ṭhahnem tak an thih bakah, hnathawktu pakhatin hliam a tuar a ni.
US-ah hian kum 2018-2021 inkar khan kangmei chhuak vangin farm-a ran vulh maktaduai thum dawn an thi a. Heng zingah hian ar an thi hnem ber a, maktaduai 1.78 vel an thi a ni.
Texas agriculture commissioner Sid Miler chuan an state-a bawng vulhna hmuna kangmei chhuak rapthlak ber a ni tih sawiin, kangmei chhuah chhan hi hriatchian a la ni lo a, chhui chian mek a ni, a ti.