US President-in WHO hnenah lehkha a thawn

US president Donald Trump chuan World Health Organisation (WHO) director general Dr Tedros Adhanom Ghebreyesus hnenah lehkha thawnin, ni 30 chhunga Covid-19 hri dona kawnga hmasawnna an neih loh chuan WHO-a US-in fund a pek ṭhin chu tihtawp hlen a nih tur thu leh, member aṭanga inhnuhdawh a ngaih dawn thu a sawi.

Trump hian thla hlui khan WHO-a US-in fund a pek chu a titawp lailawk a, a tihtawp chhan hi WHO chu Covid-19 hri dona kawnga China kaihhruaina hnuaia a awm vang a nih thu a sawi. Covid-19 hri lo chhuah ṭan danah hian China chuan thil thup a neih thu Trump chuan a lo sawi fo tawh a, WHO chuan a thup pui niin a puh bawk. He hri rawn darh ṭan tirha inralring tura ram hrang hrangte hriatttir vat an nih loh thu chu lehkhathawnah hian a ziak bawk.

China chuan US president Donald Trump-an World Health Organisation (WHO) hnenah lehkha thawn a, US fund pek ṭhin tihtawp hlena a vauna chu chhangin, US hian an rama Covid-19 leng dona a kalpui ṭhat tawk loh chu midang thiam lohah puh a tum niin a sawi. 

China foreign ministry thu­puangtu, Zhao Lijian chuan US chuan hri leng chungchangah China chu tihhmingchhiat a, US sorkarin an ram mipuite laka mawhphurhna a neihna pumpelhna zawnga, China chu dik lo taka puh a tum a ni, a ti. 

China president Xi Jinping chuan WHO tan, hri leng dona atana a hman turin US dollar tlukleh­dingawn hnih a pe dawn tih a sawi. 

President Xi chuan ram 100 chuangin Covid-19 dona kawnga WHO hma lak dan ennawn an phutna chu an ram chuan a thlawp tih a sawi bawk a, mahse hei hi hri leng mek khuahkhirh a nih theih hnu leh, WHO lamin an kaihhruaina hnuaiah neih a nih chauhin a thlawp dawn tih a sawi a ni. 

Xi chuan WHO director-general Tedros Adhanom Ghebreyesus a thlawp thu sawiin, a kaihhruaina hnuaiha WHO chuan khawvel puma hri leng mek Covid-19 dona kawngah hma hruaiin a thawk ṭha hle a ni, a ti. Ram dangte hnenah pawh sum leh thil dang hmangin WHO thlawpna lantir zel turin a ngen bawk.