Myanmar sipai sorkarin tang 3,000 chuang chhuah dawn

Myanmar sipai sorkar chuan an ram kumthar lawmna pualin, tang 3,113 chu ngaidamin a chhuah dawn a, an zingah hian ram dang mi 98 an tel.

Nimina sipai sorkar thuchhuah chuan tang chhuah an nih tur thu hi a sawi a, mahse kum 2021 February thlaa sipaiten thuneihna an chan dodaltu an mante chu chhuah zingah hian an tel dawn em tih erawh a sawilang lo.

Civil sorkar paihthlatu, sipai sorkar duh lohna lantirtu leh democracy thlawptu mi sing tel chu sipaite hian an man a, tualchhung buaina chhuakah civil mi 3,240 an thi tawh bawk niin activist-te chuan an sawi. Sipaiten an man zingah hian journalist 170 vel an tel niin UN chuan a sawi.

Sipai sorkar thupuangtu, lieutenant general Aung Lin Dwe chuan Myanmar kumthar lawmna pualin, mipuite hlimna siamsakna turin tang tam tham tak hi ngaihdam an ni tih a sawi. Tang ngaihdam zinga mite hi thil tisuala man leh an nih chuan, ngaihdam an nih bakah an tan hmabak leh hremna dang an hmachhawn a ngai dawn a ni, a ti.

Tang chhuah tur zingah hian civil sorkar paihthlak taka hruaitu an man tam takte an tel leh tel loh hriat a ni lo. Sipaite hian civil sorkara hruaitu Aung San Suu Kyi bakah a cabinet member eng emaw zat an man a ni.

Sipai sorkar hian thuneihna an chan hnuah Buddhist New Year pual hian kumtin tang eng emaw zat ngaidamin a chhuah ṭhin. Thuneihna an chan kum, kum 2021 khan tang 23,000 zet a chhuah a ni.