SKorea, US leh Japan-in missile defence drill nei

South Korea, United States leh Japan chuan North Korea-in missile hmanga a vau ṭhinna chhan letna atan nimin khan joint naval missile defence exercise an nei.

Missile defence drill hi Korea leh Japan ram inkar tuipuiah neiin, South Korea Aegis destroyer ton 7,600-a rit Yulgok Yi I, US guided-missile destroyer USS Benfold leh Japan Atagoa destroyer, Aegis radar system-a thuamte an hmang.

Ram pathumte hian a hmaa Washington-a inbiakna an neihah, an thawhhona tihchakna atan missile defence leh anti-submarine exercise-te chu mumal taka buatsaih ṭhin an remti a ni.

South Korea destroyer captain Kim Ki-young chuan, "North Korea-in nuclear leh missile hmanga mi a vau ṭhinna lakah kan thawhhona ṭhatzia leh tihchakna hun remchang tak a ni. Kan navy-te theihna lantirna leh, ballistic missile hmanga vauna kan chhanletna a ni," tiin a sawi.

North Korea hian tun hnaiah ralthuam a enchhin fo a, kar liam ta pawh khan solid-fuel hmang intercontinental ballistic missile thar a lo enchhin leh tawh bawk. NKorea hian March thla aṭanga SKorea leh US-in kumtina an neih ṭhin, military joint exercise an buatsaih chu a ngaimawh hle a, hei hi an ram laka nuclear war neihna tura an inbuatsaihna a ni tiin a vau let fo a ni.

Nimin aṭang vek khan SKorea leh US air force-te chuan joint drill an nei ṭan bawk a, ni 12 chhung a awh ang.