Sudan buainain zual lam pan zel

Sudan army chief, Abdel Fattah al-Burhan kaihhruai sipaite leh a deputy, Mohamed Hmadan Dagaland kaihhruai paramilitary group Rapid Support Force (RSF)-te thuneihna inchuha inbeihna chuan zual lam a pan zel a, nimin khan a ni thumna atan an la inkap chhunzawm a ni.

Inbeihna thlengah hian mi 100 dawn an thi tawh niin doctor's union chuan a sawi a, hliam tuar hi mi 1,100 vel an awm tawh bawk. Pathianni khan inbeihna thleng vanga hliam tuarte enkawl tura hruai chhuah an nih theihna atan hun rei vak lo inkahhai an puang.

RSF hian nimin zing khan an ram khaw­pui, Khartoum-a presi­dential palace leh Omdurman khawpui bakah, khawthlang lama Darfur leh hmarlama Merowe Airport chu an kutah a awm niin an sawi. Hetih lai hian sipaite hian airport hi an chhuh sak leh nghal nia sawi a ni thung. Sipaite chuan Khartoum-a hmun pawimawhte RSF-in an kuta a awm nia an sawi chu thu dik lo a nih thu an sawi a, RSF hmunpuite thlawhtheihna hmanga an beih hnuah sipaite hian hma an sawn zel tih an sawi a ni.

UN World Food Prog­ramme (WFP) chuan Khartoum-a inbeihnaah hian an staff member pathum an thi tih sawiin, Sudan rama an hnathawh pawh an chawl lailawk rih a ni.

Khartoum Interna­tional Airport-a sipai leh RSF-te inkahnaah WFP aircraft pakhat chu an kapchhe tel bawk.