Russia President Putin-a'n Ukraine-a Kherson bial a tlawh

Russia president Vladimir Putin chuan Ukraine khawchhak lam ram an luah, Kherson bial a tlawh a, he hmuna Russia sipai awmte chu meeting neihpuiin, commander-te hnen aṭangin report-te a ngaithla bawk.

Kum 70 mi, Putin hian Luhansk bial pawh tlawhin, Russia National Guard-te awmna, Vostok headquaters a tlawh nia sawi a ni bawk. Russia hian Ukraine a run hnuah, nikum khan Kherson leh Luhansk bial hi a luah zui a ni. Heng hmunte hi Russia hruaitu hian a tlawh ngai meuh lo a, mahse March thla khan sawi lawk loin Mariupol khawpui a lo tlawh tawh bawk a ni.

Russia parliament, Kremlin chuan Kherson biala Putin a zin thu hi a sawi a, a kal hun tak erawh a sawilang lo. Mahse Putin-a thusawi pakhatah Easter holiday thleng tur chungchang a sawilan vangin, kar liam ta lama zin niin a lang. Orthodox Easter hi Pathianni liam ta khan an hmang a ni.

Kremlin chuan Putin hian a zin tur hi a hmain a ruahman lawk lo tih a sawi bawk.

Russia media-te chuan Putin hian Russia-in a rama a chhal tel, Zaporizhzhia region chungchangte pawh a zawtchiang niin an tarlang. Kherson-a sipaite meeting a neihpuiah, sipaite chu an hnathawh danah lo tihbuai a tum loh thu sawiin, an ngaihdante hriat chu atan a pawimawh thu a hrilh.

Nikum February thlaa Russia-in Ukraine ram a run hnuah, Kherson region chauh hi a la thei a, a khawpui aṭang pawhin Russia sipaite hi inhnukdawk leh tawh bawk. Mahse he bial chhunga hmun eng emaw zat chu Russia thununna hnuaiah an la awm. Russia sipaite hi Dnipro lui lamah an inkulh ṭha leh a ni.

Putin-a'n Kherson bial a tlawhnaah hian defence miniser Sergei Shoigu leh chief of general staff Valery Gerssimov-te chuan an zui lo. Top commander pathumte hi a ruala hmun khat, a bikin indo thlen mekna hmuna awmtir hi a him lo thei niin an sawi a ni.