US-in New York-a Chinese police station siama puh mi 2 man

US chuan China tana thawk a, New York City-a Chinese secret police station siama puh mi pahnih a man.

US department of justice chuan mi pahnih an mante hi Liu Jianwang, 61, leh Chen Jinping, 59-te an nih thu sawiin, kum 2022 kumtir lam aṭang khan Manhattan-a Chinatown-ah police outpost an hawng a ni, a ti. He hmun aṭang hian China sorkar duhdan angin, New York City leh US hmun danga Chinese diapora community member-te chu an target ṭhin niin US attorney for eastern district of New York, Breon Peace chuan a sawi.

Jianwang leh Jinping-te hi US thuneitute hriattir loa China sorkar tana thawka puhna thubuai leh thubuai dangte siamsak an ni. Secret police station an siam hi chhui zui an ni tih an hriat hnuah nikum khan an titawp niin thuneitute chuan an sawi bawk.

Spanish human rights organisation, Safeguard Defenders chuan China hian ram dangah pawh hetiang police station hi an eng emaw zat a nei nia sawiin, heng station-te hi China police-te nena thawk dunin, ram danga China mi awmte chu vau leh an rama kir luih tirte an nei ṭhin a ni, a ti.

Nikum October thla khan Dutch foreign ministry chuan Netherlands-ah China sorkarin polcie station a rukin a siam nia report a awm thu leh hei hi chhui chian mek a nih thu a lo sawi tawh. Mahse China chuan an puhna hi thu dik lo niin a sawi ve thung. China pawn lamah chuan centre, Chinese police-te enkawl ni lo, a awmna rama tualchhung mite enkawl a awm ṭhin a, heng centre-te hian China mite chu a document tihthar ngai leh, puih an ngaihna dangahte a pui zawk ṭhin niin China sorkar chuan a sawi.