Israel-in Holocaust-a Juda thahte hriatrengna hun hmang

Israel chuan nimin khan Indopui II hunlaia Nazi Germany leh an thawhpuiten Juda mi maktaduai 6 zet an thahte hriatrengna hun an hmang.

Kum 1941 leh 1945 inkara Nazi Germany leh an thawhpuiten Europe-a German ram luah hrang hranga Juda mi maktaduai 6 vel an suat kha Holocaust tih a ni a, Shoah tiin an sawi bawk. Holocaust-ah hian khawvela Juda mi awm zat hmun thuma ṭhena hmun khat tihhlum an ni. Hemi hnu, kum 1948-ah modern Israel hi din niin, Juda mi dam khawchhuakte chuan hmun hrang hrang aṭangin Israel ram hi an pankhawm a ni. Europe, Israel, US leh ram dangah Holocaust survivor hi mi nuai 2.4 vel an la awm a ni.

Nimin khan Holocaust-a thite hriatrengna atan ram pumah minute hnih chhung siren tihrik a ni. Siren rik chhung hian kawngpuia ke leh motor kalte pawh an awm hmunah dingin, thite hriatrenga atan ngawi rengin an ding.

Thawhṭanni zan khan Jerusalem-a Yad Vashem Holocaust memorial-ah official-in hriatrengna hun hi hman ṭan a ni a, he hunah hian Warsaw Ghetto Uprising-a dam khawchhuak mi parukte chuan Juda mi maktaduai 6-te hriatrengna meichher chu an dep kai a ni.

Israel leh Iran ramte inep mek karah, Iran crown prince hlui Reza Pahlavi chuan Thawhṭani khan Holocaust Remembrance Day hmang tur hian Israel hi a tlawh a, Isreal official-te meeting a neihpui bawk.