Kim Jong-un pa leh pu thlalak dah bo
North Korea khawpui, Pyongyang-a Kim Il Sung Square-a Kim Jong-un-a pa leh a pu, Kim Il Sung leh Kim Jong Il thlalak tar chu dah bo a ni a, hei hian ngaihven leh sawizui a hlawh hle.
NKorea ram hotu hlui pahnihte thlalak dah bo a nih chhan hi hriatchian a ni lo a, Kim Jong Il lim pawh tihchhiat a ni bawk niin report ṭhenkhat chuan an tarlang.
Kim Il Sung Square hi Kim Jong Il a thih hnu, kum 2012 khan chei ṭhat a ni. Tuna khawih danglam a ni leh ta hian Kim Jong-un hriselna dinhmun nen sawizawm a hlawh hle a ni.
NK News chuan satellite image aṭanga a lan danin, he square-a senior official-ten military parade an thlirna ṭhin platform pawh tihchhiat a ni tih a sawi. Square khawthlang lam aṭanga motor-a tlan luhna pawh khar a ni bawk.
April thla khan NKorea hotu Kim chu a thi niin thu a thang nasa hle a, mahse May 2 khan an ram media chuan Kim-a'n Pyongyang-a fertilizer factory a hawng lai thla an tichhuak a ni. Hemi hnu hian Kim hi kar hnih chhung chu hmuh zui a ni leh tawh lo a, report ṭhenkhat chuan May 2-a a thlalak tihchhuah pawh a hma daiha lak tawh niin an sawi leh tawh a ni.