Afghanistan aṭangin UN-in inlakchhuah tum

United Nations chuan Afghanistan-a rorellai, Taliban-ten an ram hmei­chhiate UN hnuaia thawh a phalsak thei dawn lo a nih chuan, Afghanistan aṭanga inlachhuak turin rilru hrehawm tak chunga thutlukna an siam a ngai dawn tih a sawi.

UN Development Prog­ramme (UNDP) administrator Achim Steiner chuan, Taliban sorkar chu UN hnuaiah hmeichhiate hna thawh tir phalsak an nih theihna atan hian inbiakna neihpui a la ni mek tih a sawi. Mahse an ngenna hi phalsak an nih loh chuan, Afghanistan aṭangin UN chu a inlakchhuah mai a ngai dawn tih a sawi. UN mission hnuaia thawktu zingah hmeichhia tam tak an awm avangin, heng mite hna thawh phalsak an nih loh chuan chhawmdawl hna an thawhna kawngah harsatna lian tak a awm dawn a ni, a ti.

Steiner chuan Taliban-te chuan Afghan hmeichhia-te chu hna ṭhenkhat an thawh a phalsak tho nia sawiin, an ram economy dinhmun tlachhe mekah hmeichhia hnathawk tam zawk an awm pawh a ṭul a ni, tiin a sawi.

Taliban-ten kum 2021 August thlaa Afghanistan civil sorkar paihthla a, thuneihna an chelh hnuah ram hrang hrangten hrekna siamin, hei vang hian an ram sum leh pai dinhmun a tlachhe tawh hle a, chhawmdawl ngai mi tam tak an awm a ni. UN hian Afghanistan mipuite chhawmdawl hna hi thawkin; ei turte an sem a, zirna leh healthcare lamah a pui bawk. UN Mission hnuaiah hian Afghan mi thawk 3,300 awmin, an zingah hian hmeichhia 600 an tel a ni. Mahse Taliban-in UN hnuaia hmeichhiate hi hnathawh a khap tak avangin April 12 aṭang khan in lam aṭangin an thawk a, hlawh pek chhunzawm an la ni tho a ni. Hetih lai hian Taliban thupek hian UN international staff 600 zinga hmeichhia 200-te erawh a nghawng tel lo thung.