Sudan tualchhung indona thlenga thi mi 270 tling tawh
Sudan ram sipai leh paramilitary Rapid Support Forces (RSF)-te chu an ram thuneihna inchuhin an la inbei chhunzawm zel a, tualchhung indona thleng vanga thi hi mi 270 an tling tawh a, mi 2,600 chuangin hliam an tuar bawk.
Sudan khawpui, Khartoum-a an inbeih mekah, pawl pahnihte hian Thawhlehni khan khawpuia cheng leh hliam tuarte insasengna hun siamin inkahhai puang mah se, an bawhchhe zui leh nghal a ni. Inkahhai bawhchhe hmasa zawkah an inpuh tawn zui a ni.
United Nations thupuangtu, Stepahne Dujarric chuan inkahhai puan chhung pawhin an inbeina hi an titawp chuang lo tih a sawi.
US secretary of state Antony Blinken chuan Thawhlehni khan army chief general Abdel Fattah al-Burhan leh a deputy, RSF leader general Mohamed Hamdan Dagalo-te a biak thu leh, inkahhai an puan chu zawm tura a ngen thu a sawi.
Sudan army thupuangtu, colonel Khaled al-Akida chuan inremna siam hi zawm a, khawpui chhungah boruak ṭha tak siam an duh a, mahse RSF lam hian engmah an ngai pawimawh ve lo niin a puh. Hetih lai hian RSF chuan inremna an siam hi an zawm ṭhat thu an sawi ve thung. RSF adviser to commander Musa Khaddam chuan Khartoum hmun hrang hrangah an sipai dahte chuan inkahhai thuthlung an siam hi ṭha takin an zawm a ni, a ti.
Chhawmdawl hna thawktu, International Federation of Red Cross leh Red Crescent Societies chuan khawpui chhunga pawl pahnihte hi an inbeih chhunzawm reng avangin chhawmdawl hna thawh pawh kalpui hleih theih a ni lo tih an sawi. Inbeihna thleng vang hian Sudan health system pawh a tlakchhiat mai a hlauhthawnawm tawh a ni, an ti.