Beijing hospital-a Kangmei chhuakah mi 29 an thi
China khawpui, Beijing-a Bejing Changfeng Hospital-ah Thawhlehni tlai khan kangmei a chhuak a, mi 29 an thi.
Kangmei chhuahna hospital hi Fengtai district-a awm a ni a, darkar chanve hnu velah kangmei hi an ṭhelh mit thei a ni. District deputy mayor Li Zongrong chuan he thil thleng kaihhnawihah hian mi 12 man a ni a, an zingah hian hospital director pawh a tel tih a sawi. Hospital thawmṭhat hna thawktu company aiawhte man tel an ni bawk.
Li chuan thi hi mipa 16 leh hmeichhia 13 an nih thu sawiin, an zinga 26 chu damlo enkawl lai an ni a, hospital staff pahnih leh damlo awmpui pakhat an thi tel bawk tih a sawi. Damdawi-ina damlo enkawl lai 78-te chu building dangah sawnchhuah an ni, a ti.
City official-te chuan kangmei chhuahna hmun hi tlawhin, kangmei chhuah ṭan dan chhui chiang tu leh, a mawhphurtute pawh hremna pek an nih tur thu an sawi.