Yemen-a inpawngneknaah mi 78 an thi

Yemen khawpui, Sanaa-ah nimin khan Ramadan puala sum­dawngten pawisa an sem dawn ṭuma mipui kalkhawmte inpawng­nekna thlengah mi 78 an thi a, mi dang 77 an hliam.

Sanaa-a Bab al-Yemen district-a school pakhatah Ramadan pual hian charity event buatsaihin, an ram pawisa Yemeni riyal 5,000 zelin an sem a, pawisa dawn tum hian mi ṭhahnem tak an pungkhawm a ni. Kawngka hawn veleh mipuite chu school tualzawl thleng hmasa nih inchuhin an innek a, ṭhenkhat chu step aṭang tein nek thlak an ni bawk. Muslim-te thla serh, Ramadan zawh dawn pual hian sumdawngte hian thilpek hi an sem a ni.

Mipui inpawngnekna thlen hnu hian pawisa semna hun buatsaih tu, sumdawng pahnihte chu hren zui nghal a ni tih Sanaa khawpuia roreltu, Houthi thuneitute chuan a sawi. Inpawngnekna thlenga thi chhungte chu zangnadawmna, USD 2,000 ṭheuh leh, hliam tuarte chu USD 400 ṭheuh pek an nih tur thu an puang bawk.

Houthi hel hian kum 2014 khan ramdangten an pawm, Yemen sorkar chu Sanaa khawpui aṭang hian umchhuakin an thunun zui a ni. Tualchhung indona thleng avang hian mi nuai 1.5 vel an thi a, an zingah hian civil mi tam tak an tel. An ram buaina avang hian an ram mipui hmun thuma ṭhena hmun hnih, mi maktaduai 21 chuang chu chhawmdawl ngaiin an awm niin United Nations Office for the Coordination of Humanitarian Affairs chuan a sawi.