Covid-19 hri leng vangin naupang mtd 67-ten vaccine lak hun bawhpelh

United Nations chuan kum 2019-2021 inkarah khan khawvel pumah Covid-19 hri leng vangin naupang maktaduai 67-ten an vaccine lak hun an bawhpelh tih a sawi.

UN children agency, UNICEF chuan kum tam tak chhung hunbi mumal taka naupangte hnena hri laka invenna pek hna an kalpui a bahlah phah tih sawiin, ngai awh chho leh tur chuan chona hautak tak hmachhawn a ngai dawn a ni, a ti.

Naupang maktaduai 67-te zingah hian maktaduai 48-te chuan vaccine lak hun tur pumpui chu an bawhpelh tih sawiin, UNICEF chuan polio leh measle hri len leh mai hlauhthawnna a awm thu a sawi bawk.

Vaccine mumal taka pek ṭhin hian kumtin naupang maktaduai 4.4 nunna a chhanhim niin UN chuan a tarlang a, an target aṭanga an kal theih chuan kum 2030-ah chuan naupang nunna chhanchim hi mtd 5.8-ah a kai thei dawn a ni, a ti. Naupangte hriselna leh damreina atan vaccine hi a pawimawh hle a, hei vang hian vaccine pek chhuah zat tlahniam chu thil ngaihtuahzui ngai tak a ni, tiin report editor in chief Brian Keely chuan a sawi.

Vaccine siam a nih hma, kum 1963 hma khan kumtin measle vangin mi mtd 2.6 vel thi ang an ni a, thi zinga a tam zawk hi naupang an ni ṭhin. Kum 2021-ah chuan measle vanga thi hi mi nuai 1.28-ah a tlahniam tawh a ni.

Mahse kum 2019-2021 inkar khan, hripui leng vangin ram hrang hranga naupang zinga measle vaccine la hi 86% aṭangin 81% ah a tlahniam. Kum 2022 aṭang chuan a ziaawm chho leh deuh niin Keeley chuan a sawi bawk. Mahse hri len hmaa vaccine la zat ang ni leh tur chuan hun a ngai rei leh dawn a ni, a ti.

Ram hrang hrangte chu vaccine pek hna thawhna kawngah a hma aia nasa zawka ṭan la chho tura ngenin, a bikin an lak hun bawhpelh ta te chu ngaihven zui turin UNICEF chuan a chah bawk.