China-in Sri Lanka aṭangin zawng nuai 1 a lei dawn
China chuan Sri Lanka aṭangin zawng (monkey) mang mai hlauhawm zinga chhiar tel, tocque macque monkey nuai khat a lei dawn.
Sri Lanka sorkar chuan China-in zawng lei a tum thu hi a nemnghet tawh a, hetih laiin environmental group chuan zawng thawn tum hi an dodal thung. Sri Lanka ministry of agriculture-a an hotu, Gunadasa Samarasinghe chuan China private company, ransa-te inthlahpun tirna hmun Zoological Garden nena inzawmna nei chuan zawng lei tur hian ministry-ah ngenna an siam tih a sawi.
Samarasinghe chuan, "Ṭum khatah kan thawn vek dawn lo. Mahse kan ram chhung hmun hrang hranga zawngin kan thlai a tihchhiat nasat dan ngaihtuahin, China min ngenna hi kan ngaihtuah a ni. Kan thawn tur pawh hi a humhalhna hmun a mite ni loin, thlai chinna biala awmte la zawk ang," a ti.
Toque macque monkey hi Sri Lanka ram bika awm niin, International Union for Conservation of Nature (IUCN) chuan mang mai hlauhawm, endangered red list-ah a dah a. Sri Lanka-ah hian maktaduai 2-3 vel an awm nia sawi a ni.
Sri Lanka agriculture minister Mahind Aamarweera chuan China-in an rama sahuan 1,000 chuanga dah tur zawng nuai khat lakluh a dil thu hi kar liam ta khan a lo sawilang tawh bawk. Sri Lanka hian ramsa thawnchhuah hi a khap ṭhin a, mahse sum lama an tlakchhiat nasat ber ṭum an tawn mek avangin China ngenna pawh hi a ngaihtuah sak ta a ni.