UK Deputy Prime Minister Dominic Raab a bang

United Kingdom (UK) deputy prime minister leh justice minister ni bawk, Dominic Raab chu mi tiduhdah (bullying)-a puh a nih chungchanga chhui zui a nih hnuah ram hruaitu a nihna aṭangin a bang.

Raab chuan nimin khan banna a thehluh thu hi a twitter-ah tarlangin, mi tiduhdah nia an puh chungchang chu chhui chian tura amah ngei pawhin a lo ngen thu leh, an puhna chu a dik nia an hmuchhuak a nih chuan a ban tur thu pawh a lo sawi tawh a, a thu lo sawi tawh tihhlawhtlin chu thil pawimawh a nih thu a sawi. Raab hi nikum October thlaa Britain prime minister atana lakluh Rishi Sunak kaihhruai sorkar hnuaia a cabinet minister bang pathumna a ni.

Sunak hian nikum November thla khan Raab-a'n mi a tiduhdah nia puhna complaint pahnih lut chu chhui chiang turin senior employment lawyer, Adam Tolley a ruat a ni. Hemi hnu hian minister hnuaia thawk zingah Raab chet dan sawiselna complaint eng emaw zat a luh belh leh bawk.

Tolley hian Raab an puhna a chhuina report chu Ningani zing khan PM hnenah a thehlut tawh a, Sunak pawhin report hi uluk taka a zirchian tur thu a sawi. Mahse eng hunah nge report hi tlangzar a nih dawn erawh a sawilang lo.