Sudan tualchhung indonaah mi 400 chuang thi tawh

Sudan ram tualchhung indona thleng mek vanga thi chu mi 400 chuang an ni tawh a, mi 3,500 velin hliam tuar bawk niin World Health Organisation chuan a sawi.

Sudan Army leh paramilitary Rapid Support Forces(RSF) te hi an ram thuneitu nih inchuhin nimin kha ni sarih an inbeihna a ni tawh. Tualchhung indona thleng vang hian Sudan khawpui, Khartoum-a cheng civil sang tel chu tlanchhe tawhin, an ṭhenawm Chad ramah te an lut a ni. UN refugee agency, UNHCR leh World Food Programme chuan Chad rama tlanchhia mi 10,000 - 20,000 an awm tawh niin an tarlang.

Civil mite insasengna hun siamsak turin nimin zing dar 6 aṭang khan darkar 72 chhung inkahhai puan an remtih thu RSF chuan an sawi a, mahse khawpuia chengte chuan silai ri hriat tur a awm reng tho tih an sawi. Sipai lam erawh hian inkahhai puan chungchang hi engmah an sawilang ve lo thung.

United Nations secretary-general Antonio Guterres chuan Ningani khan Sudan ram dinhmun sawipuiin African Union, Arab League leh organisation dang hruaitute chu virtual meeting a neihpui. Sudan-a indo thlentu pawl pahnihte an dem thu sawiin, an buaina tihreh dan ngaihtuah thuai tura an phut thute an sawi. Guterres chuan civil mite dinhmun ngaihtuah tura ngenin, ei tur leh mamawh dang an lakna tur te, damdawi lam enkawlna an dawn theihna tur hunte pe turin a ngen.

Tualchhung indona a thlen hma pawh hian Sudan ram dinhmun hi a ṭhat loh avangin an ram mipui hmun lia ṭhena hmun khat vel chu ei tur khamkhawp nei loin, chhawmdawl ngaiin an awm a ni.