Russia-in tihpalh thilah ama khawpui a bomb

Russia chuan Ukraine nena an indo mek karah, Ningani khan tihpalh thilin Ukraine ramri bula awm, Russia khawpui Belgorod chu a bomb.

Russian Sukhoi-34 fighter jet chuan tihpalh thilah Ukraine ramri aṭanga km 40 vel chauha hlaa awm, Belgorod khua hi a bomb a, mi pathumin hliam tuarin building eng emaw zat a chhia a ni.

He thil thleng chungchangah hian Russia defence ministry pawhin thuchhuah siam nghalin, fighter jet-in ralthuam a hman sual thu a sawi a, mahse khawi hmun nge a kah tih erawh a sawilang lo. Bomb hi city centre aṭanga hla vak lo, mihring chenna building bulhnaia kawng pengṭhuamah a tla a ni. City mayor chuan bomb-in a tihchhiatte siamṭhat hna hi thawh nghal a ni dawn tih sawiin, karleh Thawhṭanniah chuan kawngpuite pawh siamṭhat vek hman a nih tur thu a sawi.

Russia ministry chuan bomb thlak sual a nih chungchang hi a chhui chiang mek tih a sawi a, mahse an chhuina result erawh mipuia hriata puanzar a nih a rinawm loh thung.

Russia jet-te hian Ukraine an beihna kawngah, mi nuai 3.5 vel chenna Bolgorod khawpui chungah hian a thlawk fo a ni. Ukraine khawpui pahnihna, Kharvik hmar lama awm niin, ram pahnihte indona thleng mekah Ukraine sipai lam pawhin Belgorod hi an bei fo a ni.