Coronavirus avanga thihna thleng report A hma angin nasa tawh lo : WHO

World Health Organi­sation chuan kar liam ta Inrinni khan khawvelina natna hri leng kan buaipui mek novel coronavirus vanga thi chu la awm chhunzawm mah se, China-a thihna chu nitin chhinchiah a nih aṭanga en chuan a hma anga a nasat tawh loh thu a puang.

Novel coronavirus avanga thi hi nimin thleng khan mainland China-ah mi 800 an chuang tawh a, kum 2002-03-a SARS leng vanga thi aiin an tam tawh zawk a ni. China bakah ram hrang hrangah he hri kai zat chhinchhiah hi mi 37,000 vel an ni tawh bawk. 

Hetih lai hian ni li liam ta chhungin hri hmuhchhuah ṭanna, Hubei province-ah chuan coronavirus vanga thihna thleng hi a hma angin a nasa tawh lo. "He hri leng vanga thihna chu a hma ang em ema tam a ni tawh lo chu a lawmawm em em a, chutih rualin a ziaawm dawn anga a lan avanga fimkhur loh tur a ni chuang lo," tiin UN health agency chuan a tarlang.

China-in a tarlan danin, Inrinni thleng khan coronavirus kai, enkawl dam tawh chu mi 2,650 an tling tawh a ni.

WHO kaihhruai team chuan naktuk hian conoravirus chung­chang chhui chiang turin China an an pan dawn. WHO hotu Tedros Adhanom Ghe­breyesus chuan he team-ah hian US Centres for Disease Control (CDS) expert pawh an tel dawn niin a sawi.