US-in Sudan-a an embassy staff-te hruai chhuak

Sudan ram tualchhung indona thleng mek avangin US chuan Sudan khawpui, Khartoum-a US embassy staff zawng zawng chu Inrinni khan a hruai chhuak.

Under secretary of state for managament John Bass chuan, Khartoum-a an embassy staff, US mi awm zawng zawng, mi 100 dawn chu hruai chhuah an nih thu leh, local staff tlem azawng chu an la awm thu a sawi. Embassy staff-te hi Chinook helicopter pathum hmangin hruai chhuah an ni.

Sudan sipai leh paramilitary force, Rapid Support Forces (RSF) te inbeihna hian ziaawm lam a la pan thei lo a, Muslim-te hun pawimawh Eid al-Fitr pualin inkahhai puang mah se, pawl pahnihte hian an inzawmna hi bawhchhiaah an inpuh tawn ve ve a ni.

France foreign ministry pawhin Sudan rama an mi leh sa awmte an hruai chhuah tur thu a puang tawh bawk. Netherlands ram pawhin Jordan ram nena thawkdunin, Dutch mite a rang thei ang berin a hruai chhuak dawn tih Dutch foreign minister chuan a sawi. Ram dang eng emaw zatin Sudan rama an mi awmte hruai chhuah an nih tur thu an sawi tawh bawk.

Nimin khan thuneihna inchuha Sudan Army leh RSF-te inbeih aṭanga a ni kua-na a ni a, United Nations chuan tualchhung indona thlengah hian mi 400 chuang an thi tawh a, hliam 3,500 chuang an awm tawh bawk niin a sawi. Khartoum leh Darfur bial aṭangin mi sang tel chu an ṭhenawm, Chad ramah an tlanchhe tawh.

Central Committee of Sudanese Doctors leh Sudan Doctors Union chuan Khartoum leh a chhehvel state-a hospital 59 zinga 39 chu inbeihna thleng vangin khar a nih thu an sawi. Sudan ram pumah internet service tihtawp a nih thu NetBlocks organisation chuan a tarlang bawk.